Vertu þú sjálfur, gerðu það sem þú vilt.......

Þessar  línur  úr  lagi  með  SSSól  vöktu  mig  til umhugsunar,  eftir  samtal  sem ég  átti  í  dag... 

1. desember,  Fullveldisdagurinn  okkar Íslendinga er nýliðinn og  minnti mig  á  hvað við  eigum gott að  búa  á Íslandi.  Það er  eflaust margt  sem mætti  betur fara  en  þrátt  fyrir  allt  eigum við  að  vera  þakklát  fyrir  að  geta  verið  við  sjálf  og  gert það  sem við viljum.  Það  er  ekki svo  langt  síðan við  höfðum ekki þessi  sjálfsögðu  réttindi að  gera  nánast allt  sem við  viljum..   Því  betur sem ég  kynnist  því  hvernig  margar  aðrar  þjóðir  hafa  það  og  ekki síst hér  í  Afríku  þá  verð ég  alltaf meira og meira  þakklátur  fyrir  að vera Íslendingur.   Og  þetta  söng  Helgi  Björns  svo snilldarlega;

 

Vertu þú  sjálfur,

gerðu það  sem þú  vilt,

Vertu þú  sjálfur,

eins og þú ert,

Láttu það flakka,

dansaðu í  vindinum

faðmaðu heiminn 

elskaðu, 

Farðu  alla  leið, 

ba babba lu babba  babba bei, 

farðu  alla  leið,,  Alla  leið

allt  til  enda,  alla  leið..... 

 

Hafið  það  eins og  þið viljið 

Magnús G. 

 

 

 

 

Aðventan í Sahara.....

Til  hamingju með  daginn allir  Íslendingar,  mér  finnst  þetta  alltaf  vera dagurinn sem  við  urðum frjáls  1. des.   og   mér  finnst  reyndar að það  ætti að  gera  svolítið meira  með  þennan  dag svona  almennt.   Ég  er  að berjast  í  lélegu  netsambandi  þessa dagana,  kemur stundum fyrir hér í Afríku að  hlutirnir  ganga  ekki  eins og maður á að venjast á Íslandi,, og  setningar  eins og  "Maybe today, maybe tomorrow or  maybe  some  day  later"  heyrir  maður stundum hér  og  maður veit  bara  ekki hvort maður á að  gráta  eða  hlægja  að  allri  þessari  vitleysu  sem  við  vesturlandabúar  erum  búin a koma  okkur í..  Maður  er eiginlega orðinn þannig að  Internet er  orðið  jafn nauðsynlegt  og  súrefni  til að  hlutirnir  gerist,  er  þetta ekki hálfgeggjað  allt  saman..  En nú  er  aðventan að hefjast  bara  núna  kl.  2400  hefst  fyrsti  sunnudagur  í  aðventu,  þessi  tími  finnst  mér alltaf  nokkuð góður og  notalegur, mikið  af  fallegum  aðventuljósum og  aðventukrönsum  ýmiskonar sem  færa  okkur  gleði  og yl  og  láta okkur  hlakka  til  jólanna  sem eru handan  við  hornið..  Ég   verð  hér  í  Eyðimörkinni  þessa aðventuna  og hlakka  til  hennar  og  mun  örugglega  hugsa  til  ykkar  sem  eruð  á  fullu í  þessu svokallaða  jólastressi,  hér  er  ekki margt sem  minnir  á  þennan tíma,  engin aðventuljós og  engar jólaskreytingar sjáanlegar  og  það  er bara  notalegt að láta  minna  sig á  hvað  þessi  tími er  skemmtilegur  á Íslandi,  njótið  aðventunnar  í  botn á  Íslandi,  ég  ætla  að gera  það  hér  í  Sahara  eyðimörkinni.

 Hafið það eins og  þið  viljið

Magnús G.  

 

Góða veislu gjöra skal....

Við  héldum flotta  veislu í  gærkvöldi.  Í  veislunni  voru allir Íslendingar í  Laayoune  og  ein Namibíukona,  einn  rússi og tveir heimamenn.   Flott  veisla  að  mér  fannst,  við  Eiríkur  elduðum  með smá aðstoð frá  nokkrum messaguttum sem  lögðu okkur lið  við  hin ýmsu verk.   Matseðillinn  var;  Foi Gras (franskt), reyktur lax og  grafinn lax (skoskt) og Laxahrognakaviar(skoskur)  þetta  voru forréttirnir,  þeir svínvirkuðu.    Í  aðalrétt  var svo  úrbeinaðar lambahryggjarsneiðar (íslenskar) með  "Steamuðu"  grænmeti, kartöflum, grænum baunum , rauðkáli og  sósu.  Miðað  við  eldað  magn og afganga  þá líkaði  maturinn  bara  vel  sýndist mér..  Í  góðum veislum  skiptir  reyndar meira  máli að  gestirnir  séu  góðir,  en minna  máli  skiptir  að  maturinn sé  framúrskarandi,  hann verður  alltaf góður  í  minningunni  ef  það var skemmtilegt í veislunni.  Hér  er samankominn  ótrúlega  skemmtilegur og  samhentur  hópur sem nær frábærlega vel  saman og  ég  er  viss um að við eigum eftir að halda margar skemmtilegar  veislur  á  komandi  árum.   Ég  vil  nú  eiginlega  bara nota þennan vettvang til a  þakka öllum sem voru í  veislunni  fyrir  að vera þar og  gera  hana svona skemmtilega.   Hér í Marokko  er  annars  búið að vera  hálfkalt  síðan ég  kom, það voru bara  14 - 15 gráður í  Casa og  svo  hér fer hitinn í  rétt rúmar  20 gráður yfir hádaginn  og maður er eiginlega bara í yfirhöfn  þessa dagana..  Svo er búið að rigna svolítið sem er frábært á þessum slóðum og rigningin hér er mjög velkomin...  Nokkrir  stífir dagar framundan  í fundarhöldum og ferðalögum, þannig að ekki reikna með bloggi fyrr en um helgi.. 

Set  inn eina svarthvíta mynd  úr veislunni.

Hafið það eins og þið viljið

Magnús G.

 

Góður göngutúr í miðborg Casablanca.....

Fékk  leiðsögn í  bæinn frá   Habibu,  fyrrverandi  ritara, hjá  okkur í  Laayoune.   Frábær  ung kona  sem því  miður þurfti að  hætta af fjölskylduástæðum.   Hún er  nú  komin á  fullt  í  nám  aftur og  ætlar að klára  doktorsnám  í veðurfræði  á  næstu árum.  Habiba  leiddi mig  um  miðbæinn hér  og  sýndi mér  m.a.  upphafsbyggðina  í  Casablanca  en þar  er nú  heljarinnar markaður  með  öllu og  engu eins  og er á  slíkum mörkuðum..  Við  gengum um í  3 tíma  og  ýmislegt  bar  fyrir augu meðal   annars  "dúfnatorgið"  þar  sem  samankomnar  voru  mörg  þúsund  dúfur  og  nokkur hundruð  menn, konur og börn.   Þessar  dúfur  eiga  griðarstað  þarna og  þeim er gefið  eitthvað að  borða og  maður  minn,  þvílíkur fjöldi,  ég hef  aldrei  séð  annað  eins  af  dúfum.   Þær  eru  nefnilega  orðnar svo  sjaldséðar  dúfur  á  Íslandi,  er  búið  að éta  þær allar eða hvað ??  Kannski  kemur  það  fram í bókinni  hans  Guðna  eins og  ýmiss  annar  fróðleikur,  hlakka  nú til að fylgjast  meira  með  þeirri  bók,  hvort  ég  nenni að lesa  hana  veit  ég ekki.  Mér  var  hugsað  til  þess enn og einu  sinni hvað við  erum  lánsöm að  búa  á  Íslandi  þar  sem langflestir  hafa  það  ágætt  og  njóta  góðs viðurværis,  ef  þú villt  mennta  þig þá færðu  námslán og  framfærsla þín er  tryggð á meðan þú  ert í  námi,  hér  þekkist  ekki neitt svona  og  ég spurði  Habibu  hvað  hún þyrfti  á  mánuði  til að komast  af  í  náminu sem hún er  í  núna.  Hún  er  í  kúrs til  að  verða  kennari  og  klárar  hann í júní  á næsta  ári  og  hún sagði  mér að  hún þyrfti ca..  1.000 Dirham  ca.  8.500 krónur  á  mánuði  til  að  komast  af.   Þegar  hún  er  komin með  kennararéttindi  þá  ætlar hún að kenna til að geta  haft  lifibrauð  á meðan hún klárar  Doktorsnám í  veðurfræði.   Það  er  gaman að kynnast svona  duglegu  ungu  fólki  með  drauma og þrár og  sem  er  svona  tilbúið að leggja  mikið á sig  til að láta  drauma sína  rætast..  ég  er  ekki í  vafa  um að  þessi unga  kona  klárar  það sem hún ætlar  sér  og það með glans..    Nú  er  ég að búa  mig  undir að  fara heim til Laayoune  í  kvöld,  vélin  fer  kl.  2135  og  lendir  ca.  2305,  það  verður  gott að komast heim, þó að þessir  óvæntu dagar  hér  í  Casablanca  hafi verið fín  hvíld sem mér  sennilega  bara  veitti ekkert  af.. 

Hafið  það eins og þið  viljið

Magnús G. 

Vakna þegar ég er búinn að sofa !!

Jæja  þá  er  ég  búinn að sofa,  reyndar  vaknaði  ég kl.  1100  alveg  úthvíldur og  fínn,  svaf eins og engill.   Ég er  nú  ekki búinn að fara á Ricks  bar  ennþá  og  fer  kannski "ef  ég  nenni"  eins og  Helgi Björns  söng  í  frægu Ítölsku (jóla) lagi  eftir  Zucchero  sem heitir Cosi Celeste, gott lag  hjá  báðum.  Ég  sagði í  bloggi  í haust að íslendingar  fara víða  og  ég verð að segja frá smáuppákomu hér á  hótelinu í  dag..  Ég  var að skjótast  niður  með lyftunni  og  hún  hentist uppá  9. hæð  og  inn kom ungur maður,  vestrænn í útliti, og  ég ávarpaði hann;  going down ?   og  hann svaraði;  ertu íslenskur ?  já  en þú, sagði ég, eins og  hálfviti, líklegt að maðurinn talaði  íslensku ef  hann væri franskur,  (ekki gleyma því að ég er  ljóska)   Maðurinn heitir Orri er Akureyringur og  flugmaður hjá  Atlanta.  Hann var  hér  eina  nótt vegna pílagrímaflugs  til Jeddah  í  Saudi Arabíu.  Við fengum okkur  tebolla  og  spjölluðum aðeins saman.  Það er  nánast rugl  þegar  maður hugsar útí  að  ég er í 6 milljón manna borg  með  hundruðum  hótela  að  ég  skuli rekast á  þennan  ágæta mann í lyftunni,   hann er hér eina nótt í fyrsta  skipti á ævinni  og  ég  líka í fyrsta skipti á hóteli í  Casablanca.  Ég  gladdist  yfir sigri Liverpool  í  dag, þeir eru náttúrulega langbestir þegar þeir eru í stuði eins og þeir voru í dag,  til hamingju allir poolarar..   Varð  vitni að   viðskiptum hér fyrir utan hótelið  í  dag,  hvort  þau  voru  lögleg  veit  ég  ekki,  er  ekki svo vel að mér í  lögum  hér,  en set inn mynd  til  skemmtunar  af  viðskiptunum  og  dæmi hver fyrir sig...

Hef  það  annars  frábært og  ætla  að halda áfram að chilla  fram á morgundaginn  og  fer  þá  heim til Laayoune  og  hlakka mikið til að koma heim.. 

Hafið það eins og þið viljið 

Magnús G.

Bogart, Bergmann og ég í Casablanca...

Var  að  lenda  í  Casablanca  á leiðinni  heim til Laayoune,  vélin  okkar  tafðist í  London um  eina klukkustund  og  það  þíðir að  ég  er  stuck  hér í   Casa  í  48 tíma  af því að ekki er flogið  til  Laayoune  aftur fyrr en á sunnudagskvöld..  Ég  var að spá í að  verða  fúll  en  ákvað  svo  að  fagna  þessu bara,  nýta  tímann  og  blogga og  hvíla mig og  skoða  eitthvað fallegt  eða  ljótt,  bara  chilla  eins  og  krakkarnir segja.    Hér  var  rigning í  dag  og  frekar  kalt  þegar ég kom bara  12 gráður,  rígningin  hér  er mjög  velkomin enda  nauðsynleg fyrir gróðurinn og  allan búskap  hér.. Ég  er að  hugsa um að  fara  á  bar  á  morgun,  þó ég  sé  svo blessunarlega laus við að þurfa að drekka,  barinn heitir held  ég  Ricks  bar  þessi eini sanni úr  kvikmynd  20 aldarinnar  CASABLANCA,  ef  hann heitir  eitthvað  annað  þá kemur  það bara í ljós í næsta bloggi.

Nú  ætla  ég að fara að sofa  og  vakna þegar ég er búinn að sofa.........

Hafið það eins og þið  viljið

Magnús G..

Tíminn líður hratt, já ótrúlega hratt...

Það  eru  nú  örugglega allir  búnir  að  gefast uppá  þessari bloggsíðu  minni, enda  hefur verið ótrúlega lítið  lífsmark með  henni  undanfarnar  vikur.  En  svona  verður  þetta  bara, það  mun sennilega  oftast koma  hlé í  bloggfærslurnar  mínar  þegar ég er  á  Íslandi  að  vinna  en  ekki í  Marokkó.   Ég  er  búinn að vera  hér  heima í  ca.  mánuð  og á leið  út  núna  á  föstudaginn  aftur og  kem  svo  heim  korter  í  jól,  til  að  vera  með krökkunum mínum á  jólunum og  til að láta mér  líða vel..   Ég  er  reyndar  búinn að hafa  nóg  að gera  þessa daga á Íslandi  og  hef  notið  þeirra  allra  og  ekki  síst  stundanna  með  öllum sem mér  þykir vænt um.. Ég  keypti mér  nýja  íbúð  sem ég  ætla að flytja  í  í  byrjun janúar,  með  bílskúr  og alles,  fullt  af  fermetrum, alveg  ný  og  flott  íbúð,  auðvitað í Kópavogi,  þar  sem best er að búa.  Við  Helga  mín  gengum  frá  lögskilnaði,  þannig að nú  er  maður alveg  frjáls  og  engum  bundinn,  lögformlegum böndum,  nema  bara bankanum.  Mér  var  nú  reyndar  hugsað  til  þess þegar við vorum hjá  sýslumanni að  allt er skattlagt  líka  skilnaðir  fólks.  Ég  skrapp  til  Dublin um helgina  og  upplifði  rigninguna  þar  sem  var  næstum því  eins  og rigningin  hér en ég  á  góða  regnhlíf sem  færði  mér  margvísleg lífsgæði og  forskot  í  Dublin.  Ég  var á  frábærri  ráðstefnu  á  föstudag, laugardag og  sunnudag,  ráðstefnu  sem gaf mér  heilmikið  og  ég á eftir að  nýta  mér á  komandi mánuðum  í  leik og starfi..

 Ég  verð nú vonadi  duglegri að blogga úr  sólinni og sandinum í  Sahara á  næstu vikum,  eigið  ánægjulega  aðventu  og  hafið það eins og þið viljið 

Magnús G.

LOKSINS KOM NÝTT BLOGG..

Jæja  kominn heim  til Íslands í  þetta  frískandi  veðurfar eins og einhver  kallaði  það.. Verð  nú  bara  að  segja  að  ég  var ekkert  farinn að sakna  svona veðurs eins og er hér í  dag..  Síðan á  um  hina  helgina  hefur  ansi  margt  gerst,  ég fór  með krökkunum  til  Tenerife,  fljúgandi og  siglandi á  tvíbytnu  og  átti 2-3  yndislega  daga  á  Tenerife  aðallega  í afslöppun  og  við  að  leika mér  í  GoKart  og  fótbolta ofl..  Ég  var að  keyra Körtu í  fyrsta sinn á ævinni  og  ég  skil  ekkert í því  afhverju  ég  var ekki að keyra í  Brasilíu  um helgina  í F1  djö  er  gaman að leika  sér  á  Körtum..    Mikið rosalega  gaman  var  að  fá krakkana  mína til mín og  og  ég er  alltaf  að  átta  mig betur og  betur á  því hvað ég  er heppinn  að  eiga  svona  frábær börn,  sem  eru alltaf  að veita  mér  meiri og meiri gleði  og  fyrir  það er ég óendanlega þakklátur...

Ég  er  byrjaður  í  Babbanum  aftur og  rosalegar  harðsperrur eru búnar að  hrjá  mig  síðan á  laugardaginn en  ég  næ þeim  úr mér í  tímanum í dag  og  verð fínn á  eftir.   Það  sem er  best  við  að koma  heim  eftir  svona  langan  tíma er að  hitta  allt  þetta  frábæra fólk  sem  ég  þekki og tel  til  vina  og kunningja minna  og  é g er búinn að  hitta  ótrúlega marga á þessum fáu dögum sem liðnir eru síðan ég kom  heim..    Ég  fór  með  Stjána  vini mínum á  Dýrfirðingaball á  laugardaginn og það var  nú  bara  eins og  vera á  balli í  Félagsheimilinu á  Þingeyri  og  mjög  gaman að  hitta  alla  þessa  góðu Dýrfirðinga  og  fyrrverandi  sveitunga  mína  til  margra  ára..

 Hafið það eins og þið  viljið 

Magnús G. 

Ótrúleg uppákoma..

Marokkomenn  eru alltaf  að koma  mér  meira og meira á  óvart..  Í gær  var  ég  á  viðskiptafundi  með  einujm af okkar ágætu samstarfsaðilum og  ég sagði  honum að tvö af  þremur börnum mínum og  kærasti  dóttur  minnar væru að koma til mín  síðar um daginn.   Hann  sagði  þá  strax;  þú  verður að koma  með þau í  mat til mín á morgun  í  hádeginu,  það verður  veisla,  RAMADAN er búin og  þá  höldum við veislu,  mætið kl. 1345.    Skal  gert  herra minn sagði ég.    Auðvitað mættum við svo í veisluna  sem var  einhver  sú  flottast sem við höfum komið í  öll sömul,   endur og  heilgrilluð lömb  á  borð borin ásamt  Kous Kous  og  ávöxtum og fl. 0fl.   Við  hittum Lögreglustjórann  í  Laayoune í  veislunni og spjölluðum heilmikið við hann um heima og geima og allt þar á milli.  Þetta  matarboð  var mikil reynsla fyrir  okkur öll og ékki síst  krakkana  sem sáu alveg nýja mynd af  Marokkó  og siðunum hér.    Eftir  veisluna  fórum við svo í bíltúr um bæinn okkar  og  út í Eyðimörkina..   Núna  rétt áðan var svo hringt í mig  af  lögreglustjóranum og  hann spurði   mig hvort ég  væri heima,  úps  á  nú taka  mann  hugsaði ég,  sagði ég eitthvað við hann í dag sem ekki passaði.    Ég  sagði honum nú  bara að koma og hitta  og það gerði hann við annan  mann  sem  var sá  hinn sami og  bauð okkur í matinn í dag, klyfjaður að pökkum og  pinklum.   Hann færði okkur öllum  gjafir, Sigrúnu  silfur skart  og  okkur strákunum  hefðbundna  kufla  og   Hákoni skó  til viðbótar..  Við  stóðum  hér orðlaus  af  undrun  og  sáum hér  enn eina  nýja mynd af  þessu góða fólki sem hér  býr  og  er alltaf að koma mér á óvart... 

Á morgun förum ég og krakkarnir yfir á Kanarí og  verðum saman þar í nokkra daga og svo heim til Íslands  á  miðvikudaginn...  Glæsilegur dagur að kveldi kominn  frábært að hafa krakkana  hér og  leyfa þeim að upplifa  aðeins lífið hér í Marokkó.. 

 Hafið það eins og  þið viljið

Magnús G...

Að opna föstuna ........

Ég  upplifði  skemmtilega  reynslu í  kvöld.  Eins  og  ég  hef  verið að blogga  þá  er núna  föstumánuður  múslíma  svokallað  Ramadan og  á  þessum  tíma  breytist  margt.   Múslímar  fasta  frá  sólarupprás  til  sólarlags  og  þegar sólin gengur undir  þá  opna þeir  föstuna.   Mér  var  semsagt  boðið að vera  viðstaddur  föstuopnun  hjá  einum af  okkar ágætu  viðskiptafélögum  hér,  hann býr vel eins og flestir  í  stórri íbúð  með  mikið af  mósaiki og  skrauti um allt.  Við  Karim vinur  minn mættum kl.   1820  í  matinn og  vorum með fyrstu mönnum, einn mættur á undan okkur félögunum.  Á  næstu  mínútum  streymdu  inn  karlmenn,  engar konur,  og  þegar yfir lauk þá  vorum við  orðnir  16 held  ég og  hófst nú  athöfnin  á  bæn.   Múslimar  biðja  5 sinnum á  dag og  ein bænin  er  á  bilinu  hálf sjö  til  sjö.  Bænin  tekur ca.  5  mínútur   og  tóku allir  þátt í  henni  nema ég og  einn  annar kristinn maður sem  var  á  staðnum.. Bænin var  leidd af  einum gestanna  og  hinir  fylgdu honum í  bænahaldinu.  Að  aflokinni  bæninni  þá  hófst  matarveisla  hin  mesta  og  gæddum  við okkur á  margskonar  góðgæti  sem  allt var í raun hefðbundinn  marakóskur matur,  byrjað  á  góðri  fiskisúpu og  svo  kom  fiskur, kjöt og  margt fleira  sem ég kann  ekki að nefna.  Veislan  stóð í rúman  klukkutima og  þá  tæmdist húsið  allt í  einu  eiginlega án þess að maður tæki eftir því  og  menn fóru flestir í  stóru Moskuna í  bænum að biðjast  fyrir.  Í  dag  er  22 dagur í  Ramadan  og  bara  rúm vika  eftir.. mér er sagt að Ramadan ljúki 14. október n.k.

Þetta  var bara  skemmtileg  reynsla  og færir  mann  aðeins nær fólkinu hér  og  auðgar lífið. 

Ég  var  Las Palmas í  tvo  daga  og kom heim um kl.  1600 í  dag,  Las  Palmas  er  bara  nokkuð  skemmtilegur  staður og  mikið  um að  vera  þar.  Ég  á örugglega eftir að fara þangað  aftur  í  frí og njóta  þess  sem í boði er  þar.   Skelli inn einni mynd af Las Palmas 

Hafið það eins og þið  viljið

Bestu kveðjur úr sólinni og  sandinum i  Sahara    Magnús G.