Var að velta fyrir mér öllum þessum

ofbeldismálum og  dómsmálum sem komið hafa  uppá  undanfarnar  vikur og  mánuði  og  sumar  af  niðurstöðunum  finnst  mér  alveg  ótrúlegar  og  ekki í  neinum takti við heilbrigða  skynsemi. 

Löggumálið á  Laugaveginum  finnst  mér  eiginlega  eitt það ótrúlegasta  af  þeim öllum,  þ.e.a.s. síknudómurinn sem  árásarmennirnir  fengu  eftir  að  hafa ráðist á lögregluna  sem var  að  sinna  skyldustörfum.   Ég  er nú  eiginlega  ekki hissa  á því að  lögreglumenn  endist ekki  lengi  í  starfi nú á dögum,  þegar  þetta  er  vinnuaðstaðan sem þeim er  búin..  Auðvitað  á  að dæma  menn sem ráðast á  lögregluna  og  berja  starfsmenn hennar eins og  harðfisk úti á götu og  reyndar  tel  ég  að  lögreglumenn,  sérstaklega  þeir  sem vinna  óeinkennisklæddir,  eigi  að vinna sér  inn það  mikla virðingu  frá  þeim sem eru í undirheimunum að  ekki  sé  ráðist á þá  á götum úti.   Þegar  ég á við  virðingu þá  tel ég að lögreglan þurfi  í  dag, miðað  við  hvernig þjóðfélagið er að  þróast, að  hafa heimild  til að vinna þannig  að málum  að  menn  ráðist  bara  alls ekki  á  þá  á  víðavangi,  án þess að hljóta langa  refsivist  að launum..

Málið  nú  um páskana  er ótrúlegt  og líkist  helst  atriðum úr  ofbeldismyndum, þar  sem  ofbeldi er  sett á  svið  en er ekki  raunverulegt eins og í  þessu tilviki,  ég  vona að  tekið verði  á þessum málum af  festu því  borgararnir geta  ekki búið  við svona uppákomur  og átt á hættu  að menn ryðjist inn til  fólks í  svona  erindagjörðum. 

Sú  þróun sem virðist vera að eiga  sér  stað  hér  á  Stór Reykjavíkursvæðinu er  í  raun hrikaleg og  það verður að grípa inní  hér  af  festu og mér er til efs að það dugi  að  Lögreglustjórinn gangi  niður Laugaveginn annað slagið í  gallanum (sem er reyndar mjög  gott framtak og  er ég ekki að lasta  það) og láti mynda sig.   Hér  þarf að taka upp  skilvirkari aðferðir sem duga  og  vernda  um leið starfsmenn lögreglunnar.

Annað  mál  sem mér finnst   líka vera  í  hróplegu ósamræmi við það sem við höfum verið að upplífa  hér hingað til og  ég er í  raun alveg hissa á niðurstöðunni..  Það  er dómurinn sem  móðir  barnsins fékk sem  skellti  hurðinni á  kennarann.   Ef  ég  skildi málið rétt er  barnið  greindar eða þroskaskert  og kannski getur það ekki eða kann  ekki að stjórna  gjörðum sínum og  sennilega er það ástæða  þessa slyss.    Ef  ég  man  rétt var kennaranum dæmdar  10 milljónir króna  og móðir  barnsins  er ábyrg fyrir  greiðslunni.  Ég  hélt  að  þetta væri  vinnuslys  en ekki ofbeldisaðgerð af hálfu  móðurinnar í gegnum barnið,  gagnvart kennaranum.  Ég  reyndar játa að ég hef ekki lesið dóminn og þess vegna  þekki ég ekki alla málavexti - en samt.   Þeir sem beita konur og börn  hrottalegu  kynferðislegu ofbeldi,  sleppa sumir  með  nokkur hundruðþúsundkall í skaða og  eða miskabætur  og  skilorðsbundinn dóm.  Ég bara verð  að játa  að ég  skil  ekki samhengið í þessu.   Ég  hef  alltaf  litið svo á  að  lögin í landinu séu  " Common sense "  á  prenti  og  þess vegna verði  dómar  sem byggðir eru á  þessu að  hafa einhvern common sense  líka..  Æ  þetta  er bara búið að vera  að bögglast í mér um stund og nú er ég búinn að tjá mig  um málið og .........

Hafið það eins og þið  viljið og berum virðingu fyrir löggunni..

Magnús G. 

      

Í dag kynntist ég nýrri konu...

Hún er  komin af léttasta  skeiði  er  bandarísk  held  ég og ótrúlega  fjölhæf.  Kynnin  við  hana  gera  mann  eins og mig að ótrúlega  miklu  fjölhæfari  manni en áður,  þannig að  þetta  sýnist  mér  ætla  að  verða  frábært samband  okkar í  milli..

Konan  heitir  Betty og  ber  fjölskyldunafnið  Crocker  og  hún  hjálpaði  okkur  Hákoni  með aldeilis  flott bakkelsi  í  dag,  já við  skelltum  í  eina  Gulrótarköku  sem tókst svona ljómandi  vel..  Smelltum  líka  Iceing  á  kökuna  og  ég er  ekki  viss  um  þær  séu  neitt betri  þessar flottu úr  bakaríunum,  allavega  getur  maður  sagt með stolti  að  maður hafi  bakað  sjálfur, en það getur maður ekki  ef  maður  stoppar  hjá  JF  á  leiðinni heim.  (Jói er  náttúrulega flottur sko en .....)

Ég verð  að  játa að  þetta er í  fyrsta  sinn á  ævinni sem ég  baka  köku  aleinn og sjálfur  án þess að hringja  í  nokkurn  mann  og  leita  ráða,  bara ég og  Betty  saman í  eldhúsinu og  svo kom  Konni  og  setti  kremið  á kökuna  og  uppí  sig sjálfan.   Já  þetta  gat  ´ann  kallinn. 

Annars  ætla  ég  líka  að játa  á mig  að  hafa  ekki farið útúr  húsi  í  dag   og  Hákon hefur  ekki klætt sig,  alveg  slakur og  við erum búnir að slappa  feikilega vel af í dag,  fengum líka heimsókn frá  þeim  sómahjónum  Magnúsi  og  Steinunni  sem færðu  okkur  blóm og  mynd,  takk fyrir  okkur.

Eitt  enn  ætla  ég að játa á  mig.   Ég  málaði  tvær  smámyndir  í  dag  með olíumálningu,  hef  ekki gripið  í  penslana  mína  í  ein  4 ár og  mikið  var þetta  gaman,  nú  læt  ég  slag  standa og held  áfram,  frábær  útrás  sem  maður fær  við  að  mála.  Ég er  nú  enginn Kjarval  ennþá  en  hver  veit  hvað  verður,  þetta  er  víst aðallega  æfing  og  eitthvað  smá  af  hæfileikum.  Nú  er  bara að  æfa  sig...

Semsagt  frábærir  páskar  að  lokum komnir  og  ég  tekst á  við  nýja  viku  fullur af  orku  og  eldmóði. 

Hafið  það eins og þið  viljið  á næstu  dögum

Magnús G.

Set inn  mynd af flottu kaffisetti sem hæfir svona flottu bakkelsi.

Páskadagur eins og hann á að vera.

Nú  er  þessi  frábæri  páskadagur að  kveldi  kominn  og  hann hefur verið mér afar góður.. Við  Hákon fórum í mat  til Mömmu  í  hádeginu (frábært  hjá  henni að bjóða okkur)  síðan  fór Hákon á Players  með  stóra  bróður að  horfa  á  Arsenal  tapa  fyrir  Chelsea  og  við  töpuðum  víst  líka  fyrr  í  dag fyrir  Man Utd.  þetta  er  kannski það  eins sem hefði mátt vera  allt  öðruvísi.  Ég  tók  fram  hjólið  mitt og  hentist  einn    klukkutímahring  í rigningunni  og  mikið  var það hressandi og  gaman  að  fara aftur út að hjóla.   Ég  fékk svo öll  börnin  mín í  mat til  mín í kvöld  og miðað við hvað  þau  borðuðu  mikið  þá  held ég að  eldunin á Gourmet lærinu  frá  Goða  gamla hafi  tekist vel.   Það  var  virkilega gaman að fá  öll  börnin  hingað  í  mat, og  þetta þarf ég að gera oftar  og heiti  því  hér með að gera það.   

Ég  vil  nota tækifærið og óska  öllum gleðilegra páska 

Hafið það eins og þið  viljið

Magnús G.

Laugardagurinn fyrir páska...

Þessi  laugardagur  hefur verið  fínn  og  ýmislegt  reikað um hugann  sem  minnir á  þennan dag.  Fyrir  35  árum var ég  á sjó  á trillu  frá Reykjavík.   Áhöfnin var  auk mín Faðir  minn  heitinn,  Friðgeir  bróðir  minn og  Jón Þór  Sigurðsson sem  bjó  í sama húsi og  við  á Hlíðarveginum í  Kópavogi..  Grásleppuverðtíðin þetta árið var að byrja og  við að  fara með fyrstu  trossurnar.  Við  lónuðum úti við  7 baujuna,  karlinn hann pabbi  var  að  leggja  lokahönd á netin og  gera  þau klár  til að leggja  þau og  bað  mig  um að  lóna  um  svæðið á  meðan.   Ég  sá  nokkra fugla  sem hringuðu sig yfir einhverju  og þeir vöktu athyglí  mína. ég  Hélt  í áttina að fuglunum  og  þegar við áttum nokkra tugi  metra  ófarna að fuglunum  spratt  karlinn upp og  sagði  að  það væri  maður  í sjónum  beint  framundan bátnum,  sem og var.   Þarna  var  kornungur maður  sem hafði  fallið fyrir borð á  Vita-varðskipinu Árvakri sem  fór  út  nokkru á undan okkur.   Við  drógum manninn um  borð  og  settum á fullu ferðina í land  og  komum  manninum  heilum undir læknishendur.   Ekki voru  netin lögð  þennan laugardaginn enda  ágætur afli að bjarga  manni  og  vonandi hefur þessum ágæta manni vegnað  vel í lífinu.   

Dagurinn í  gær  var  flottur,  ég  nýtti mér  nálægðina  við  náttúruna  og  gekk hringinn í kringum Elliðavatn í  stórkostlegu  veðri,   ég  mætti  nokkurhundruð  hestamönnum sem nýttu góða veðrið  til  útreiða.    Örugglega  frábært  hobby  hestamennskan,  sérstaklega á svona dögum.  Í  gærkvöldi  fór  ég  svo  á  hátíðarfund  AA  samtakanna  í  Laugardalshöllinni  og  þetta var frábær  fundur og stórkostlegt að upplifa þann góða  anda sem ríkti á fundinum.   Strax eftir fundinn fór ég á  tónleika  til styrktar XA radio  þar sem fram komu frábærir  listamenn sem allir  gáfu  vinnu sína,  skemmtilegir  tónleikar og  vonandi safnaðist nóg fyrir sendinum.

Á  skírdag gekk ég  á  Helgafell í roki og  frosti,  ansi  hressilegt og  þó að  Helgafellið  sé  nú  ekki hátt var bara  helv. hvasst   uppi, fínn dagur skírdagur.. 

Annars ætla ég að  taka því  eins rólega og  ég bara  get nú um páskana  og  slappa eins vel af og framast er í boði.

Gleðilega páska og  hafið það eins og þið viljið um páskana..

Magnús G 

 

Til hamingju strákar....

Hákon  minn og  liðið  hans  A  lið  Breiðabliks  í 6. flokki  fóru  í  frægaðarför  til  Akureyrar   um helgina.  Þeir  voru að keppa  á  Goðamótinu  og  unnu  mótið.  Frábær  árangur og glæsileg  frammistaða.. 

Það  verður  örugglega mjög  gefandi  að fylgjast  með  þessum frábæru  knattspyrnumönnum  í  sumar  og  fá  að  gleðjast  með  þeim. 

Flottir  strákar -   aftur til hamingju.

Hafið það svo eins og þið  viljið 

Magnús G..

www.godamot.blog.is

 

 

Frábær saga sem ég fékk..

Þegar  ég opnaði  póstinn minn í  dag  var  þessi  frábæra saga  í  póshólfinu mínu,   mig  langar  að  deila  henni  með  ykkur  til  umhugsunar;

Dag einn bað kennari nemendur sína að skrifa nöfn bekkjarfélaganna á blað.
Þeir áttu að skrifa eitt nafn í hverja línu og hafa auða línu á milli.
 Síðan bað hún nemendur sína að hugsa um það besta um hvern og einn og
skrifa það fyrir neðan nafnið. Þegar nemendur fóru úr tíma skiluðu þau
blöðunum til  kennarans sem fór með þetta heim og bjó til lista yfir hvern
nemanda og  safnaði saman því sem bekkjarfélagarnir höfðu skrifað.  Síðan
fengu nemendurnir þetta í hendurnar daginn eftir. Þegar þeir lásu  þetta
urðu þeir hissa á öllu því jákvæða sem bekkjarfélagarnir höfðu  skrifað.
Þeir höfðu ekki gert sér grein fyrir að þeir skiptu svona miklu  máli.
Kennarinn vissi ekki hve mikið nemendurnir ræddu þetta sín á milli eða við
foreldrana en þetta hafði tilætlaðan árangur. Nemendurnir urðu ánægðari með
sig og aðra í bekknum, þeim leið betur.
 Lífið hélt áfram.
 Mörgum árum seinna lést einn nemendanna sem hét Magnús og kennarinn ákvað
að vera viðstaddur jarðarförina. Einn vinur hins látna gekk til hennar og
spurði hvort hún hefði verið kennarinn hans og sagði að Magnús hefði talað
mikið um hana. Foreldrar hins látna komu einnig til hennar og vildu sýna
henni svolítið. Þau höfðu fundið samanbrotið blað í veski Magnúsar og var
það listinn með öllu jákvæðu atriðunum frá bekkjarfélögunum sem kennarinn
hafði fengið honum fyrir mörgum árum. "Þakka þér fyrir að gera þetta,því
eins og þú sérð þá skipti þetta hann miklu máli" sagði móðir Magnúsar.
 Fyrrum bekkjarfélagar tóku undir það og sögðu að þessi listi hefði fylgt
þeim öllum gegnum lífið og skipt þá mjög miklu máli. Þetta var eitt af Því
sem þeim þótti vænst um. Þegar gamli kennarinn heyrði þetta settist hún
niður og grét, bæði syrgði hún Magnús og svo var hún hrærð yfir því að hafa
snert nemendur sína með þessu uppátæki.
 Flest okkar hegðum við okkur þannig eins og að við höfum gleymt því að
lífið endar einn góðan veðurdag. Enginn okkar veit hvenær sá dagur verður.
Þess vegna bið ég þig að segja við þá sem þér þykir vænt um hvað þeir séu
þér mikilvægir og eigi sérstakan stað í hjarta þér. Gerðu það oft áður en
það  verður of seint.
 Eitt af því sem þú getur gert er að senda þetta áfram. Ef þú gerir það ekki
þá hefur þú misst af tækifæri til þess að gera eitthvað gott fyrir þá sem
eru þér mikilvægir. Ef þú hefur fengið þetta bréf þá er það af því að
einhverjum þykir vænt um þig og að alla vega einni persónu finnst þú vera
mikilvæg/ur. Sendu þetta áfram. Sýndu að þér er annt um vini þína. Mundu að
þú uppskerð eins og þú sáir. Mundu að þú ert mikilvægur einhverjum. Vona að
dagurinn verði þér finn og sérstakur því þú skiptir miklu máli!

Þetta  er eitt af því sem ég  legg inn  í  þennan  fallega  dag.

Hafið  það eins og þið  viljið..

Magnús G. 

Leynivinaleikur

Þessa  vikuna  er búinn að vera  í  gangi  leynivinaleikur í  vinnunni.   Þetta  er ótrúlega  skemmtilegt  framtak  og  ég er búinn að fá 3  frábærar  gjafir  frá  leynivini  sem ég  hef  ekki  minnsta grun um hver  er,  geri  mér  enga grein fyrir þvi hvort  viðkomandi  er karl eða  kona og  satt  að segja  er ég alveg  LOST   í  málinu..  en  biðinni  lýkur á  morgun og  sannleikurinn kemur  í ljós  og  ég fæ  tækifæri  til að þakka fyrir mig.   Það er ótrúlegt hvað  svona  einfaldur leikur  skapar  mikla gleði  og  brýtur upp hversdagsleikann  á  vinnustað  og  ég mæli  með  þessu..   Ég  á  líka  leynivin  sem  ég  hef  verið að  færa  gjafir  og  ekki  veit ég  hvort  leynivinur  minn  grunar  mig  um að vera  leynivinur,  kemur líka í  ljós á  morgun,   bara gaman..

Annars er  ég að búa  mig  til brottfarar til  Marokkó  í  næstu  viku og  verð  þá  einhvern  tíma í  burtu  frá landinu okkar  fagra.   Ég  hlakka nú  bara til að koma heim  til Laayoune  og hitta  allt  það  frábæra  fólk  sem  ég þekki þar og  starfa  með. 

Hvernig  finnst ykkur  nýi  smellurinn hjá  Mercedes  club,   hlakka til að heyra  alla  plötuna,  ég  er farinn að trúa  því  að  ég  geti  átt framtíð fyrir mér sem poppari.   Eins og myndin sýnir er ég  liðtækur  skóburstari  (hvað  gerði  maður  ekki fyrir góða tengdamömmu),  því  ekki poppari   ?

Hafið  það  eins og þið  viljið

Magnús G. 

Grái Kötturinn nei nei Fiðringurinn..

Fékk  þessa bráðskemmtilegu  fréttatilkynningu sem ég ætla  að deila  með  ykkur sem eruð  svo heppin að lesa síðuna  mína.   Ég  verð nú  bara að segja  að þessi  þróun hefur verið frábær  en mér  sýnist  hún  alveg komin  á  enda  eða hvað..???

Er þetta  ekki dásamlegt  líf....

Hafið það eins og þið  viljið og  hugsið um Gróðurhúsaáhrifin

Magnús G 

Gæfuspor....

Er  hugsanlegt  að  að  staða hvers  og  eins  sé  afrakstur af  því  hvernig  viðkomandi hefur  stigið  niður  á sínu  ferðalagi,  hvort  sporin  sem  tekin hafa  verið  eru  gæfuspor eða  ekki.    Ég  sá  í  bloggfærslu  hjá  kærri  vinkonu  minni  að  "Maður  ræður  því  sjálfur  hvað maður  gerir"  og  þess vegna  ræður  maður því  sjálfur  hvernig  maður  stígur  niður  á  ferðalagi  lífsins  og  staða  manns  ræðst  af  því  hvernig  sporin  eru í  fortíðinni...

Það  hefur  verið  mér  hugleikið  undanfarið  hvernig  hvernig  mín  spor  eru og  hvort  staða  mín  sé  í  samræmi  við  sporin  mín  og  svarið  er  já,  lóðbeint  samhengi er á  milli.  Ef  gæfusporin sem maður  stígur eru  fleiri en  hin  þá  líður  manni  vel og maður  nýtur  velgengni í  lífinu  og  rétt er að  taka  fram á þessum  að  velgengni í lífinu snýst um fleira en  peninga,  þó  að  þeir  séu  auðvitað  nauðsynlegir  til að auðga lífið  og  gera  það  skemmtilegra.  Skortur  á  peningum er  djöfullegur  og  veldur  miklum  vandræðum  hjá  mörgum  svo að  það  fari  nú  ekkert  á milli mála.

Mín  stærstu  gæfuspor  í  lífinu  eru  í  mínum  huga,  sporið  sem  ég  steig  þegar  ég  gifti  mig árið  1985,  yndislegri  konu  úr  Borgarnesi,  sem  gaf  mér  23 ár  og  á  með  mér  3  yndisleg  börn,  þetta  spor  hefur fært  mér  mikla  gæfu  og gleði  og gerir  enn.   Hitt  stóra  sporið  mitt  er  svo  þegar  ég  tók  sjálfan  mig  í  fangið  á  árunum  2003  og   2004  og  breytti  um  lífsstíl  í  grundvallaratriðum.   Minn  lífsstíll  var  að  draga  mig  til  dauða  í  hægt  en  örugglega,  alltof  feitur, hátt kólesteról,  þrek og  máttleysi,  slen,  beinþynnig  og  svo  mætti  lengi  telja,  engin regluleg líkamsrækt.  Í  þessu  ástandi var  ég  frekar  bölsýnn  og  satt að  segja  var  ég kvíðinn fyrir  framtíðinni.   Einhverntíma  á  árinu 2002  settist  á öxlina  á  mér  engill  sem sagði  mér  að  skipta um stefnu  og  það tók mig  u.m.þ.b.  eitt ár að  átta  mig.  

Ég  skipti  alveg um  lífsstíl,  ég  fór að  rækta  líkamann reglulega  með  frábærum árangri  og  ég  fór  að  rækta hugann  líka með  ekki síðri  árangri  því  hvort tveggja  er nauðsynlegt  öllum manneskjum  til að öðlast  vellíðan. 

Ég  hef  auðvitað  stigið  mörg  fleiri  gæfuspor í  lífinu,  sem hafa  fært  mér  fullt  að skemmtilegum  minningum og  marga  góða vini  og  kunningja  og  í  kvöld  ætla ég að  hitta nokkra  þeirra,  fólk  sem  var  samtíða  mér  Namibíu  fyrir  rúmum 10 árum. 

Vöndum  okkur  í  sporunum og  reynum að  hafa  gæfusporin fleiri  en  hin.

 

Set  inn  mynd  af  nokkrum austfirðingum sem komu  í  kaffi til mín  á  síðasta sunnudag,  Jökull, Svanhildur og  Svenni  frá  Eskifirði og  Hákon Örn  ættaður  frá Stöðvarfirði

Hafið þið  eins og  þið  viljið 

Magnús G 

Merkisdagur í dag..

Í  dag  er  mikill  merkisdagur  í  Íslandssögunni,  fyrsta  Kaupfélagið var stofnað á  þessum degi   1882  og  svo  var  Samband  Ísl.  Samvinnufélaga  einnig stofnað  á  þessum degi  1902.   Fyrir  mann  eins og  mig  sem  í  raun er  fæddur  og uppalinn  í  Samvinnuhreyfingunni,  þá  vekur þessi  dagur nú  alltaf  upp  góðar  minningar.   Ég  hef  stundum velt  því  fyrir mér,  ef  að  menn myndu skoða  sögu samvinnuhreyfingarinnar  á  Íslandi  af  sanngirni og  án  þess að blanda  flokkspólitík  inni hugsanir  sínar, hvort að  niðurstaðan  væri  ekki  sú,  að   stofnun  kaupfélaganna og  félaga á  þeirra vegum,  vegi  ekki  hvað  þyngst í  sjálfstæðisbaráttu þjóðarinnar  á  síðustu öld.   Kannski  lögðu  samvinnufélögin grunninn að velmeguninni  sem  við  búum við í  dag.    Gríðarlega  miklar  breytingar hafa orðið  á  efnahagslífinu á  Íslandi  á  undanförnum árum,  samvinnufélögin  flest eru  hætt starfsemi,  þeirra  hugmyndafræði  hætti að henta fólkinu  og  félögin  náðu  ekki að aðlaga sig  að breyttum aðstæðum  á  réttum tíma  og  því  fór  sem fór.   Landsbyggðin  á  meiri  varnarbaráttu  nú  en  nokkru  sinni fyrr  og  þúsundir  manna  flytja  á  höfuðborgarsvæðið  árlega  af  landsbyggðinni.   Í  dag eru  nokkrar  fyrirtækjablokkir í  eigu örfárra einstaklinga  sem  eiga  nánast  allt  atvinnulífið  og  stjórna nánast  öllu  á  Íslandi,  fjármagni,  fiskveiðum, verslun,  flutningum á sjó, landi og  í lofti,  fjölmiðlum  og  svo  mætti  lengi  telja. 

Kaupfélögin um land  allt  og  Sambandið í  Reykjavík og  á  Akureyri  ráku  umfangsmikla atvinnustarfsemi  fast  að  einni  öld  og  ég  er  einn af  þeim  heppnu  að  mér  finnst að  hafa fengið  tækifæri  til að kynnast  Samvinnuhreyfingunni  vel.  Ég  fékk  m.a.  tækifæri  til að sitja í  stjórn  Sambandsins  fyrir  hönd  starfsmanna  þess  á  árunum  1984 - 1987  og  það  var  mikil  lífsreynsla  fyrir  ungan  mann  að  fá tækifæri til að sitja í stjórn stærsta  fyrirtækis  landsins á þeim tíma..

Ekki  veit  ég  hvort  Samvinnuhreyfing  gengur í  endurnýjun  lífdaga  á  Íslandi  aftur ? ,  kannski í   einhverri  mynd  ef  fólki  ofbýður  eins og  fyrir  rúmum  100 árum  þegar menn tóku sig  saman og stofnuðu  kaupfélögin.   Ég  reyndar  held  að  þessi  þróun sé  hafin erlendis  og  komi  fram  nú  í  formi  MLM (Multi Level Marketing )   fyrirtækja  sem  vaxa  í  raun með  miklum hraða viðast hvar í  heiminum. 

Annars  vil  ég nota tækifærið og  óska  tveimur  heiðursmönnum til hamingju með afmælið í dag,  þeim  Halldóri  Bjarnasyni fyrrverandi tengdaföður mínum  og  Gunnari Erni  Gunnarssyni  bakara og  samstarfsmanni  í  nokkur  ár  sem  er  50 ára dag..

Hafið það eins og þið  viljið 

Magnús G