Markmið, til hvers að setja sér markmið ?

Mér  er  eitthvað  svo  hugleikið  þetta með  markmiðin  þessa  dagana,  kannski af  því að  ég er ekki búinn að klára  að  setja  upp markmiðin  mín  fyrir árið  2008.  Undanfarin  ár  hef  ég  sett mér  skýr  og  skriflega  markmið  um flesta  hluti,  heilsuna,  fjölskylduna, fjárhaginn ofl. ofl  og  ég  verð  að segja að þetta  hefur breytt ótrúlega miklu  fyrir mig.    Það  er  skemmtilegt hvað margir  eru farnir að gera  þetta  og  ná  þannig  fram  meiri  lífsgæðum fyrir  sig og sína.   Sagan segir að  u.m.þ.b.  4 %  jarðarbúa  setji  sér markmið  og  hin  96 %  vinni  svo hörðum höndum að  því að þessi 4%  nái  sínum markmiðum.   Máltækið  segir að  þeir  sem ekki setja  sér  markmið,   eru dæmdir  til að vinna  fyrir þá  sem  setja sér markmið. 

Málið  er  ekkert  flókið,  við  eigum val,  val um að vera  í  4%  hópnum eða  hinum  hópnum.   Annars  höfum við það  bara  gott  ég og strákarnir  Hákon og  Darri  sem  er í  gistingu hjá okkur núna,   Harry  Potter  æði  er  að  ganga yfir hér  hjá  okkur, bækurnar lesnar  og  myndirnar  skoðaðar  og  mikill  tími  fer í Harry  þessa  dagana.    Verð  aðeins  að  minnast á Skype´ið  þetta  undrakerfi  sem  gerir  okkur  nútímafólki  kleift að  vera í  sambandi  fyrir  mjög  lítinn tilkostnað.   Ég var að koma úr  fjölsímtali  við  tvo  gamla og góða  vini  til  margra  ára,  annar  býr  í  Canada og  hinn austur á  héraði og  við  vorum allir  inni  í  einu,  frábært  kerfi skype. 

Febrúar  byrjar  vel  og  ég hlakka til að takast á við mörg  krefjandi  verkefni sem  bíða  mín   og  ég er alveg  viss  um að Febrúar  verður mér góður  mánuður...

Hafið það eins og þið viljið og munið eftir markmiðunum..

Magnús G. 

 

 

Í gær var MEGA PARTÝ........

Jæja  þá  er  maður  næstum því búinn að koma sér fyrir  í  Ásakórnum,  allar  gardínurnar komanar á  sinn stað og  myndir á veggina,  bækurnar í hillurnar,  tölvan tengd   og svo  framvegis........

Hið  raunverulega  innflutningspartý  var svo í  gær  þegar  hingað  mættu einir  15 10 ára  guttar í  stórafmæli  Hákonar sem  varð 10 ára  þann  13. janúar  s.l.   Íbúðin  stóðst  álagið,  engar skemmdir,  allir  sluppu óslasaðir  og  saddir,  enda  hesthúsuðu  þeir 6 stórum pizzum,  hellingi af brauðstöngum,   skúffuköku,  íspinnum  ofl..  Kók, fanta og  appelsín í  lítravís  rann  ljúft ofan í  þessa  kalla  og  af  hávaðanum að  dæma  þá skemmtu þeir sér hið besta. 

Þetta  var  frábært partý  og  gaman að halda það hér í nýju  íbúðinni okkar.... 

 

Hafið  það  svo eins og þið viljið 

Magnús G. 

Fluttur í Ásakórinn............................

Jæja  jæja  þá  er ég  fluttur í  Ásakór  9  íbúð  303,  kominn  með  símann og  netið og  og  kössunum fækkar á  gólfinu.   Ég  get  nú  bara  ekki minnst á  þessa flutninga án þess að  þakka  börnunum mínum   öllum  fyrir hjálpina,   Hákoni  fyrir  burð og  kannski sérstaklega  fyrir að vera góður á  meðan á öllum hamaganginum   stóð.   Sigrún  Ásta,  vann  með  mér  alla helginu eins og  SLEGGJA  Í  HELV'ITI og  hún  fær frábærar þakkir  fyrir fórnfýsi og  dugnað.    Steinar tengdasonur fær  frábærar þakkir  fyrir  allan burðinn  og  hjálpina.  Friðjón   Kristjánsson  fyrir burðinn á  borðinu og  þunguhlutunum á  laugardaginn  og  Guðjón  Már  fyrir hjálpina við að koma öllu á  sinn  stað innandyra,  en hann átti  ekki mikið heimangengt um helgina vegna  vinnu.  Víð  Hákon sváfum hér  á  Laugardaginn  og  við  sváfum  mjög  vel   og  okkur  dreymdi  ekkert  sem mér er sagt að sé  betra en að dreyma eitthvað slæmt..  Íbúðin er  mjög  skemmtileg   og  ég er  mjög  ánægður  með  íbúðina  og  staðinn, svona  í  jaðri  bæjarins  og  stutt í náttúruna.   Það  er  gott útsýni  til  Esjunnar og  í Hvalfjarðarkjaftinn  og  út á sundin blá og  svo  í  suður  uppí  Rjúpnahæðina og  suðureftir  í  átt að Heiðmörkinni.  Ég kláraði  að  þrífa Gullsmárann  í  kvöld  og  fékk  frábæra  hjálp  frá  Völu  valkyrju og  vorum  við  ekki nema  rétt um klukkutíma að  þrífa allt, inní  alla skápa  og  ryksugað og skúrað  útí  öll  horn..

Við  Hákon ætlum að halda uppá  afmælið  hans á  Sunnudaginn  hér  í  Ásakór   og  bjóða  bestu vinum hans.  

Miðað  við síðustu  fréttir af  vígstöðvunum í  Reykjavík  þá  sannast það enn og aftur að  "ÞAÐ ER GOTT AÐ BÚA Í  KÓPAVOGI"  og  ég  er viss  um  að þið sem ennþá  búið í Reykjavík eruð velkomin  í  Kópavog, það er nóg  pláss,  ef ég man rétt þá eigum við land austur undir Hornafjörð..

Það eru auðvitað allir velkomnir í heimsókn í Ásakórinn..

Hafið það eins og þið viljið...

Magnús G..

Það var sagt mér ..............

Það  var  einhver  velunnari  minn  sem sagði  mér að þetta væri  nú  að verða pínlegt  með  bloggsíðuna  mína,  aldrei  neitt nýtt   og   komið  langt inná  nýja  árið,  ég  var  farin að halda að þú  værir  dauður  drengur...  og svo  frv.    Alltí  lagi  ég  samþykki  þetta  bara  og reyni að bæta  úr og koma  með  fullan poka  af  afsökunum,  þó  ég  reyndar  sé  þeirrar  skoðunar að,  afsakanir séu  bein  leið  til helvítis,  fyrirgefið  orðbragðið.   Það  er  búið að vera  ótrúlega mikið að  gera  hjá  mér og  ég  er ekki  fluttur  ennþá,  flyt  kannski um helgina.  vonandi..  Íbúðin  er  orðin  klár  til  innflutnings,  eina  vandamálið er að  það hefur ekki verið hægt  að  ganga frá  kaupsamningi ennþá  vegna tæknilegra  vandamála, en þau leysast  nú í næstu  viku..

Ég  lofa  því að  vera  duglegri að blogga þegar ég  verð  fluttur  inn og  örugglega  þegar  ég  verð kominn niður til Marokkó  aftur..  Annars átti  Hákon  minn stórafmæli  um  daginn  þann.  13  janúar,  hann varð  10 ára  og  við fórum  á  Pizza  Hut  í  tilefni  dagsins.  Við  ætlum svo að halda  Mega  Partý  þegar  við  verðum fluttir  inn í  Ásakórinn..

 Takk fyrir  að  heimsækja  síðuna  mína 

Hafið það eins og þið  viljið 

Magnús G.

Gleðilegt nýtt ár og takk fyrir öll þau gömlu..

Jæja  þá  eru  jólin liðin og  áramótin líka og  nýtt  ár hafið  árið  2008.   Ég  er  viss um þetta ár  verður fullt af nýjum tækifærum og  ákorunum til að takast á við ..  Ég  átti  góðan jóladag  framan af  degi  og  fór  í þennan  líka  fína  göngutúr  uppí  Ásakór  og  aftur  til baka og á bakleiðinni lenti ég  í  byl  og  stórhríð  sem er nú  bara skemmtilegt  hér á  Stór Kópavogssvæðinu.. Jólahelgin fékk  heldur  snöggan endi hjá mér  síðdegis á jóladag,  þegar mér bárust  fréttir af  hinu hörmulega  slysi  sem varð um borð í einu af  skipunum okkar.  Í  þessu slysi  létust tveir  frábærir  starfsmenn,  annar þeirra heimamaður  í Marokko  og  svo  skipstjóri  skipsins  Helgi Jóhannsson,  þeirra er  beggja  sárt  saknað  og  missir  fjölskyldna  þeirra er  þó  auðvitað  mestur  og  votta  ég  þeim mína  dýpstu  samúð.   Með okkur  Helga  hafið  tekist  sérstakur og  góður  vinskapur  á  þessum fáu  mánuðum sem kynni okkar  vörðu  og mun  ég sakna  þess að geta  ekki  átt við hann  hressilegar og  skemmtilegar  samræður í  framtíðinni,  en  minningin um góðan mann lifir.  Eðlilega hefur tíminn  undanfarna daga  farið í  mál  tengd  þessu hörmulega slysi  og  töluverð  vinna  fylgir því að fá  lík  flutt milli landa.   

Áramótin  hjá  mér voru hefðbundin,  við  vorum öll  saman  eins og undanfarin  rúm 20  ár,,  börnin  okkar Helgu,  við  vorum  heima  hjá  Helgu  ásamt  móðiur Helgu og  systur  og  hjá  okkur voru  okkar  kæru vinir  Bergþóra og  Kristján  og  Friðjón og Mímí  og  Eríkur faðir Kristjáns.  Maturinn var   hefðbundinn,  rjúpusúpa frá  mér  og   Kalkúnn og  kaffiís  frá  Helgu..  allt  gott.  Raketturnar  fengu frí  en við   sendum tvær  tertur  til  himins  í  rokinu í  gærkvöldi,  varla  stætt,  en ótrúlega miklu  skotið upp samt..   Við  skutumst  áðan  feðgar og  tókum  Darra Gunnarsson frænda  okkar  með  í smá  rakettushow  sem gekk flott,  við  skutum upp í  Kórahverfinu... þetta árið ..    Ég  fór í  skemmtilegt  fertugsafmæili í  dag hjá  vestfirskri  blómarós og  það  skemmtilegasta  við afmælið var að það var svona  ekta  afmæli með tertum, kaffi og  appelsíni,  alltaf gaman að  hitta fólk sem maður hefur ekki hitt áður.   Á  morgun hefst ég handa við  parketlögn  og  frágang  í  Ásakór  og  stefni að flutningi á  næstu dögum..

Ég  vil  þakka öllum fyrir  árið sem var að líða og  óska öllum gleði og  gæfu á   nýu ári  

Hafið það  eins og þið viljið á nýja árinu 

Magnús G.

 

 

 

Jólanótt..

Jólanótt finnst mér alltaf eitthvað svo notaleg,  maður  slappar af eftir góðan mat á aðfangadag,  búinn að gleðjast með sínum nánustu,  vonandi að sem flestir hafi tækifæri til þess, sjá gleðina í andlitum allra  þegar pakkarnir koma úr umbúðunum.  

Ég átti  mjög notalegt  aðfangadagskvöld, flottur forréttur hjá Helgu, Rjúpurnar og Hamborgarhryggurinn voru  frábær  og  Kaffiísinn klikkar aldrei.  Notalegt og  afslappað aðfangadagskvöld..   Ég  skrapp í aftansöng  í Digraneskirkju sem var nú bara nokkuð þétt setin.  Séra Yrsa Þórðardóttir þjónaði  og  gerði það vel,  hún  lagði  út frá  frelsinu í ræðu sinni og  held ég nú að það hafi verið  tímabært að  minna á hvað við erum nú heppin að búa á Íslandi við allt þetta frelsi.. jafnvel þó  við megum ekki fara á sjó nema hafa kvóta.   

Ég  er búinn að kveikja  á friðarkertinu mínu á svölunum og  vona að það færi sem flestum frið í sálinni. 

Hafið það eins og þið viljið 

Magnús G.

Aðfangadagur Jóla ......

Góðan  aðfangadaginn,  vona að allir séu búnir að öllu,  ég á  bara  eftir að  rífa rjúpurnar úr kápunni  og þá  er  ég klár í jólin..  Ég  verð nú  bara  að þakka  honum Vigga  frænda mínum  á  Fáskrúðsfirði fyrir rjúpurnar sem hann sendi mér og  ekki bara bjargar hann miklu á jólunum fyrir mig,  heldur var  hann örugglega að vinna sér  inn  vist á himninum með þessu góðverki..   Takk  kæri  frændi,  svona  góðverk  fær  maður alltaf  launuð,  eigðu gleðileg jól og  öll þín fjölskylda.  Í  gær  var  Þorláksmessa,  ef einhver  skyldi hafa misst af því  og  þá  var  árleg skötuveisla  hér  hjá mér  í  boði móður  minnar  og  ótrúlega  er þetta  nú  skemmtilegur siður að  koma svona  saman til að  borða og bara til að hittast  og  slappa aðeins af í öllu jólastressinu..   Skatan  var  frábær  að  vanda, elduð á svölunum og  allir fengu nóg,  líka þeir sem voru í pizzunum.   Ég  er búinn að pakka inn öllum  jólapökkunum  og  vonandi  vera allir ánægðir með val mitt á gjöfum þetta árið.   Ég  er svo heppinn að jólin verða  hefðbundin hjá  mér  ég verð  með  krökkunum mínum og  Helgu minni fyrrverandi eiginkonu og  núverandi vinkonu  og  ég er nú  afskaplega  þakklátur fyrir  að  við  skulum geta  átt þessa stund  saman fjölskyldan  og  notið hennar..  það verður tvíréttað í kvöld, rjúpur og hamborgarahryggur...  Ég  skrapp aðeins  í  bæinn  í gærkvöldi  með  vinkonu minni og  kíkti á jólaösina  og  ég verð að segja að það  er  alltaf jafnskemmtilegt  að  sjá  allt þetta fólk  á  Laugaveginum  og  Skólavörðustígnum á  Þorláksmessu  og  flestir bara að spóka sig  og  stresslausir með öllu,  skemmtilegur siður að  kíkja aðeins í bæinn á þessum degi..   Ég  datt inní  Gallery  á Skólavörðustígunum og keypti mér litla mynd eftir Kjarval,  já  ég sagði Kjarval,  Maríu S. Kjarval,   frábær  mynd...

Með þessum orðum ætla  ég að kveðja ykkur og óska öllum bloggvinum og  þeim sem heimsækja þessa síðu mína,  gleðilegra jóla og  vona að þið  hafið það eins og þið viljið á jólunum,  ég ætla að hafa  það gott.....

Magnús G. 

Jólin alveg að koma og ég er bara að verða tilbúinn í þau....

Jæja  þá  er er  smá hlé í  öllum veisluhöldunum sem byrjuðu á  jólahlaðborði  á  fimmtudaginn,  að  vísu  var bara létt salat  hjá  Jonna  á  Energía bar í gær en í kvöld  var  stúdentsveislan hans Guðjóns míns,  frábær  veisla  fyrir nánustu  skyldmenni og vini Guðjóns,  fínar  snittur og spjót  frá Jóni Rúnari Areliussyni.   Á  morgun verður svo  árleg skötuveisla  Mömmu sem ég held nú eins og  undanfarin  8 - 10 ár, þá  mæta  allir  sem geta af systkynunum og börnum þeirra,  skatan verður elduð á  svölunum eins og venjulega  af  tillitsemi við aðra íbúa hússins og til að  draga úr lyktinni..Ég  geri ráð fyrir mörgum á morgun  og  krakkarnir  fá  Dominos  flatbökur þ.e.a.s.  þeir sem ekki borða skötuna..

Það er búið að  vera frábært að upplifa þetta stúdents  dæmi allt með Guðjóni  og  ég  er  mjög stoltur af  honum og  hlakka til að fylgjast með honum á  komandi  árum,  hann á eftir að spjara sig fínt.. Ég  fæ  vonandi að endurtaka þetta  allt  í vor þegar  Sigrún  Ásta útskrifast..  

Hákon  minn flutti til mín á  fimmtudaginn og er búinn að vera á mína ábyrgð síðan þá og  mikið  er ég  nú þakklátur fyrir að eiga þennan  frábæra strák, sem er búinn að vera eins og Jólaljós  allan  tímann  og  veitt mér ómetanlega gleði..   Framundan eru jólin og  við verðum  saman á aðfangadag og svo eitthvað á  annan og  aftur um áramótin sem við eyðum með  Kristjáni og Bergþóru að vanda og verðum heima hjá Helgu þetta árið ..

Í  gær  var hátíð lambsins í  Marokkó  og  er  það  gríðarlega mikil  fjölskylduhátíð  hjá  Múhammeðstrúarmönnum,  ekki minni en okkar jól,  það  lamast í rauninni allt í víku til 10 daga eins hér nú þegar eru svona jól (Stórubrandarjól)  með svona mörgum frídögum. 

Ég óska  öllum gleðilegra jóla og  farsældar á komandi árum  og  vona  að allir hafi það eins og þeir vilja  á jólunum eins og alltaf..

Magnús G.

 

Kominn heim....

Jæja  kominn heim  og  mikið rosalega er gott að hitta fólkið sitt og  jafnvel rok og rigning  eins og í  gær í Keflavik fara nú að teljast  til standarda hér á landi.. 

Er að fara í útskrift  Guðjóns  og  hlakka  til að sjá  kallinn setja upp húfuna,  ég  er  mjög stoltur  af  mínum manni og veit að hann á eftir að spjara sig vel.

Ég  er  með svo stranga dagskrá fram að jólum að ég sé  ekki fram á tima fyrir blogg  og  þess vegna  vil ég  þakka öllum sem hafa heimsótt síðuna  mína  og  yfirhöfuð öllum  vinum og vandamönnum og vandalausum, Gleðilegra Jóla og gleðilegs nýs  árs  með  þakklæti  fyrir  allt liðið. 

Hafið það nú endilega  eins og þið viljið um jólin 

 

Magnús G..

Mynd  af rokinu í Sahara,  það getur blásið þar líka

 

Tölvupósturinn... Lokakafli .. ný mynd og reiði....

Jæja nú er  er ég alveg orðinn viss um að  búið sé að ná tökum á  tölvupóstinum fræga og búið að koma honum fyrir kattarnef  einu sinni fyrir allt..  en vitiði það að dagatalið sem ég fékk með þessum pósti var frábært og ég er búinn að búa  til mitt eigið  sem ég mun dreifa til valinna einstaklinga nú um áramótin.. 

Eins og þið sjáið  þá er komin ný mynd  á toppinn á síðunni minni, þessa mynd tók ég í október í  eyðimörkinni  og  var ég að reyna að fanga sand-skafrenninginn sem var,  þennan renning  sem myndar þessar gríðarlega stórfenglegu sanddöldur sem eru óteljandi um alla eyðimörkina,  þið allavega takið viljann fyrir verkið.. 

Ég  var svo heppinn að kynnast  góðum manni fyrir tæpum 40 árum,  þessi ágæti  maður hét  Bogi Þórðarson  og var lengi kaupfélagsstjóri á Patró og síðar starfsmaður í Sjávarafurðadeild Sambandsins  og  aðstoðarmaður  Steingríms Hermannssonar í  Sjávarútvegsráðuneytinu.   Bogi heitinn, sem ég kallaði nú oftast frænda, þó við værum ekkert skyldir,  gaf  mér mörg góð  ráð sem flest  hafa nú fallið í gleymskunnar  dá.    Eitt af  ráðum Boga  er mér mjög minnisstætt og  ég hef notað  það oft og það hefur gagnast mér vel  í  áratugi.. Hann sagði,   Magnús minn,  þú skalt aldrei reiðast nema af mjög vel yfirveguðu  ráði.   Þetta  sagði hann mér blessaður og  mikil  er  spekin í þessari ráðleggingu, því  oftast segir maður nú einhverja bölvaða vitleysu ef maður snöggreiðist, eitthvað sem maður sér lengi eftir og nagar samviskuna.    Þetta  ráð Boga  vinar míns  verður mitt framlag til vina og kunningja  á aðventunni þetta árið.. Blessuð sé minning  Boga Þórðarsonar.. 

Annars er ég bara fínn  og tilbúinn  að leggja í ann til Íslands á miðvikudaginn..

Hafið það eins og þið viljið  og bestu kveðjur úr sólinni og sandinum í Sahara..

Magnús G.