Er ....þvottur nauðsynlegur ?

Ég  hef  oft  velt fyrir mér  hvort nauðsynlegt sé að "þvo"  heilann í  sér  endrum og  sinnum  og  ég hef  komist  að  þeirri niðurstöðu að það  sé  bráðnauðsynlegt.   Orðið  "heilaþvottur"  hefur  einhverja  neikvæða  merkingu  og  er yfirleitt  notað  um  einhverja  neikvæða  hluti  og  eða misnotað  til að gera  jákvæða  hluti  neikvæða.   Við  þvoum fötin  okkar  þegar þau eru skítug, og  svo förum við í  bað  þegar við  á  og  þrífum hús og  þvoum bíla, burstum skó  og  hvað  eina.   Ef  við  nærum ekki  hugann með jákvæðni  og  hvatningu,  þá  setjast að í höfðinu  á  okkur  óhreinindi sem  trufla  jákvæða  hugsun og  framþróun  til góðra  verka.   

Ég  nýti  mér  allskonar  aðferðir  til hreinsunar  á  heilanum,  þvæ  hann, reglulega  með lestri góðra  bóka, hlustun á  uppbyggilegt  efni,  samneyti við vel  þenkjandi  og  jákvætt fólk.  Þetta hefur fært mér ótrúlega  miklu  jákvæðari tilveru eftir að ég hóf "....þvottinn"  Hvet  alla  til að fara  í Heilaþvott,  það er  engu að tapa.   

Smelli  inn einu  þvottabandi af Youtube 

Hafið það eins og þið  viljið

Magnús G. 

 

Merkileg kona með fallega sýn á málin...

Ég  var  svo  heppinn  í gærkvöldi  að  sjá  þátt Evu Maríu,  þar  sem hún ræddi  við  Kristínu  Pétursdóttur  hugsjónakonu.   Kristín  hefði  eflaust getað  náð  í  hæstu  hæðir  innan  Kaupþings eða í  einhverju öðru  stórfyrirtæki  en  hún  valdi  að  hætta  störfum af því að  hún  hafði  hugsjón.

Ég  hef  alltaf  verið  hrifinn af  fólki  sem  hefur  hugsjónir og  er  tilbúið  að  fórna  efnislegum  verðmætum og  frama  fyrir  þær.    

Eftirfarandi er skrifað  á  heimasíðu  http://www.audur.is/

 Við höfnum því viðhorfi að velja þurfi á milli fjárhagslegrar arðsemi og samfélagslegs ávinnings. Við teljum að það felist fjárhagslegur ávinningur í því að taka samfélagslega ábyrgð. Ef þú ert á sömu skoðun gætum við einmitt verið sá valkostur sem þú hefur beðið eftir.

Ég  er  svo  innilega sammála þessum kjarnakonum sem standa að þessu fyrirtæki,  að  það  felist  fjárhagslegur ávinningur í  því að taka samfélagslega ábyrgð.  Ég  er svo heppinn að geta verið stoltur  af  því að  hafa komið  að  verkefnum,  sérstaklega  erlendis,  þar sem fátækt  er  mikil,  þar  sem  samfélagsleg  ábyrgð  hefur verið  eitt  af  leiðarljósunum.

Ég  vona  að þessi sjóður eigi eftir  að skapa mikil  verðmæti  með  samfélagslegri  ábyrgð,  gangi  ykkur  vel..

Hafið það  bara annars  eins og þið  viljið

Magnús G. 

Kristín Pétursdóttir forst.  Auður Capital

Systkinadagur í gær..

Í  gær  var  systkinadagur  hjá  okkur  systkinunum frá  Strönd/Tröð  í Fáskrúðsfirði.   Ólöf  María  var  fermd  og allir  á  landinu og  mættu  í fermingarveisluna í   hæsta  veislusal  landsins  sem  er  auðvitað í Kópavogi.   Fermingar  eru  yndislegar  ekki bara  fyrir  unglinginn sem  fermist og  fær      " bunch af money", heldur  ekkert  síður  fyrir fjölskyldurnar  sem standa að  unglingnum og  sameinast á  þessum degi..  Dagurinn  hennar  frænku  minnar  var  sérdeilis  fallegur,  veislustaðurinn sá  flottasti,  maturinn frábær,  tónlistin og  söngur  fermingarbarnsins  í  hæsta  gæðaflokki.  Ég  var  svo  heppinn  að hafa  börnin mín 3  og  mömmu  þeirra  líka  þannig  að  mín  litla fjölskylda  sameinaðist  í  þessa 3  tíma  sem var  bara  yndislegt.    En  um  kvöldið  byrjaði  svo  fjörið,  boðað  var í  Partý  í  Baugakórnum  og  boðið  uppá  léttar veitingar,  fyrir þá  sem vildu.  Þarna  komum  við  saman  öll  alsystkinin  í  fyrsta  sinn í nokkuð  mörg  ár  og  það  var  tekin  mynd sem  birt verður  með  þessu  bloggi..  Þegar  partý ið  stóð  sem hæst  var rennt  á  ball  á  Players  "Austfirðingaball"   og  þar  voru  fyrir ´61  árgangurinn úr  Austurbæ  Kópavogs koma  saman  líka.   Ég  fer  nú  ekki  oft  á  ball  núorðið,  en þetta  var  skemmtilegt  ball og  það  var  gaman  að  hitta marga  bæði  að  austan og úr þessum fína árgangi sem ég  tengdist ágætlega fyrr  á  árum. 

Nú  fer  í  hönd  einhver  mikilvægasta  vika  sem  upp hefur runnið  í  langan  tíma  og  ég  verð að vanda  mig  sérstaklega vel  í  því  sem ég  geri  og geri  ekki þessa vikuna.    Ég  fer  inní  vikuna  fullur  af  bjartsýni  og trúi á  jákvæða  niðurstöðu  í nokkrum  málum.

Hlakka  til  næsta  systkinadags

Hafið það eins og þið viljið 

Magnús G

Þú ert

það sem þú  gerir,  ekki það  sem þú  segir.    Ég  var  einhvern  veginn  harkalega  minntur  á  þessa  speki  þegar ég sá  kastljósið í kvöld,  þar  sem samfylkingarmaður  úr  samtökunum  Fagra  Ísland  var að svara fyrir  stefnu  SF  í  umhverfismálum,  fyrir  kosningar  og  eftir kosningar  og  þáttöku í  ríkisstjórn.   

Annars  er  alltaf  gott að  hafa  þetta  á  hreinu í  hverju sem menn eru að gera,  hver og  einn er fyrirmynd  fyrir einhvern og  það  er ekki trúverðugt að  segja t.d.  börnunum sínum að það sé hættulegt að reykja  og  að  þau skuli alls  ekki gera það,  en  reykja  sjálfur.   Þeir  sem tala  alltaf  um að  gera  hlutina  verða  aldrei  neitt annað  en  einhverjir gúmmítöffarar,  hinir  sem  gera  eru  alvöru..

Hafið  það eins og þið  viljið 

Magnús G. 

Ef maður gerir alltaf

það  sem maður  hefur alltaf  gert,  þá  fær  maður alltaf það  sem maður hefur  alltaf fengið.     Nú  þegar  kreppir  aðeins að   þá  verðum við  að  hafa  þetta  hugfast    og minnast þess að  ef  við  ætlum ekki  að fara  illa  útúr  kreppunni  þá  þá  verðum við að breyta  um  taktík  og  fá  eitthvað  meira  útúr daglegum  athöfnum okkar.

Hafið  það eins og þið viljið..

Magnús G.

 

Jordan meikaði það

af því að hann stóð  alltaf upp aftur og aftur og  æfði sig betur og betur í  hvert  sinn sem  hann gerði  mistök.   Mistök  eru  til að læra  af  þeim  og  gera okkur að  betri  einstaklingum.  Látum ekki deigan síga  þó það gangi ekki allt upp eins  og við  ætlum..

Hafið það eins og þið viljið  

Magnús G 

Hvers vegna

kvartar maður stundum yfir tímabundnum erfiðleikum og  einhverjum algerum  aukaatriðum,  þegar  maður á  það  val  að  hugsa  bara  eins og þessi  stórkostlegi  maður. 

Gefið  ykkur endilega þær  10 mínútur sem þetta tekur,  það bara  bætir ykkur.. 

Góða  helgi 

 

Magnús G..

Fallinn er frá

Helgi  Hallvarðsson  fyrrverandi  skipherra hjá  Landhelgisgæslunni.  Ég  get  ekki  látið hjá líða  að  minnast  hans  með  nokkrum  orðum,  enda  er  hann einn  af  þeim mönnum  sem ég  hef  verið  hvað  stoltastur af  að  þekkja  og  vera  samferða.   Þegar  ég  hóf  störf  hjá Landhegisgæslunni árið  1975  sem  vikapiltur  (messagutti)  á  VS.  Þór  þá  var  Helgi  skipherra  þar.  Ég  man  nú  ekkert  sérstaklega  eftir  fyrstu vikunum enda  var  skipið  í  Reykjavíkurhöfn þar sem verið var að gera  það klárt  fyrir  útfærslu landhelginnar í  200 sml. um haustið.   Ég fór  í  skólann og  kom  svo  aftur um borð í  Þór  rétt fyrir jólin og  Helgi  var þar skipherra.  Þór var nýkominn úr  hildarleiknum  í  Seyðisfirði þar sem dráttarbátarnir  reyndu að sökkva honum  en  tókst  ekki,  sennilega  vegna hæfileika  skipherrans í  að fara  með  skip.  Jólatúrinn 1975,  sem voru  mín fyrstu  Jól á sjó, af  mörgum,  var  líka  mjög  minnistæður  fyrir mig  og kynntist  ég  mörgum hliðum á  Helga  Hallvarðs  í þessum túr.  Hann var að  mínu  mati  fádæma  laginn  skipstjóri  og áræðinn sérstaklega  í  þorskastríðinu.  Hann fór  vel  með  okkur  mannskapinn og  sýndi  okkur  messunum  líka virðingu, en það var ekkert  sjálfgefið á  þessum árum.   Við  lentum í tveimur  ásiglingum í  þessum túr,  sá fyrri  var  mjög harður  og  mikið  sá á  Þór  gamla,  mig  minnir að  Andromeda  hafi  reynt að sökkva  okkur í  þetta  skiptið  og  hinn síðari  var  við Leander  og var sá  mjög  afdrifaríkur, því  í  framhaldi  af  þeim árekstri  var  stjórnmálasambandi við  Bretland  slitið.  Ég  silgdi  með  Helga  nokkrum sinnum  á  árunum fyrir  1980  m.a. á  Óðni   og  alltaf  kunni ég  jafnvel  við  Kallinn.  

Ég  mun  ávallt  minnast  Helga  Hallvarðs  með  miklu þakklæti  og virðingu,  enda  var  hann fyrsti  alvöru skipstjórinn  minn.   

Ég  votta aðstandendum  Helga  mína  dýpstu  samúð  og  bið  Guð að  blessa minningu hans.

Hafið það eins og þið viljið

Magnús G

Set  inn  mynd af  Helga sem tekin var á  Þorskastríðsárunum, en þá  gekk hann undir  nafninu  BABY FACE   hjá  bretunum sem við  vorum að eiga við .  Ég  man m.a.  eftir  því að  hafa séð  svona  gamalt  Westra  plakat  með  orðunum  Wanted,  dead or alive,  Helgi BabyFace  Hallvardsson,  og  var þetta auðvitað  merki um hversu  erfiður hann  var  bretunum.  Einnig set  ég inn mynd  af Þór eins og  hann var í  Þorskastríðinu  1975-1976 (flottur og ber  sig  vel sá gamli.)

Var að velta fyrir mér öllum þessum

ofbeldismálum og  dómsmálum sem komið hafa  uppá  undanfarnar  vikur og  mánuði  og  sumar  af  niðurstöðunum  finnst  mér  alveg  ótrúlegar  og  ekki í  neinum takti við heilbrigða  skynsemi. 

Löggumálið á  Laugaveginum  finnst  mér  eiginlega  eitt það ótrúlegasta  af  þeim öllum,  þ.e.a.s. síknudómurinn sem  árásarmennirnir  fengu  eftir  að  hafa ráðist á lögregluna  sem var  að  sinna  skyldustörfum.   Ég  er nú  eiginlega  ekki hissa  á því að  lögreglumenn  endist ekki  lengi  í  starfi nú á dögum,  þegar  þetta  er  vinnuaðstaðan sem þeim er  búin..  Auðvitað  á  að dæma  menn sem ráðast á  lögregluna  og  berja  starfsmenn hennar eins og  harðfisk úti á götu og  reyndar  tel  ég  að  lögreglumenn,  sérstaklega  þeir  sem vinna  óeinkennisklæddir,  eigi  að vinna sér  inn það  mikla virðingu  frá  þeim sem eru í undirheimunum að  ekki  sé  ráðist á þá  á götum úti.   Þegar  ég á við  virðingu þá  tel ég að lögreglan þurfi  í  dag, miðað  við  hvernig þjóðfélagið er að  þróast, að  hafa heimild  til að vinna þannig  að málum  að  menn  ráðist  bara  alls ekki  á  þá  á  víðavangi,  án þess að hljóta langa  refsivist  að launum..

Málið  nú  um páskana  er ótrúlegt  og líkist  helst  atriðum úr  ofbeldismyndum, þar  sem  ofbeldi er  sett á  svið  en er ekki  raunverulegt eins og í  þessu tilviki,  ég  vona að  tekið verði  á þessum málum af  festu því  borgararnir geta  ekki búið  við svona uppákomur  og átt á hættu  að menn ryðjist inn til  fólks í  svona  erindagjörðum. 

Sú  þróun sem virðist vera að eiga  sér  stað  hér  á  Stór Reykjavíkursvæðinu er  í  raun hrikaleg og  það verður að grípa inní  hér  af  festu og mér er til efs að það dugi  að  Lögreglustjórinn gangi  niður Laugaveginn annað slagið í  gallanum (sem er reyndar mjög  gott framtak og  er ég ekki að lasta  það) og láti mynda sig.   Hér  þarf að taka upp  skilvirkari aðferðir sem duga  og  vernda  um leið starfsmenn lögreglunnar.

Annað  mál  sem mér finnst   líka vera  í  hróplegu ósamræmi við það sem við höfum verið að upplífa  hér hingað til og  ég er í  raun alveg hissa á niðurstöðunni..  Það  er dómurinn sem  móðir  barnsins fékk sem  skellti  hurðinni á  kennarann.   Ef  ég  skildi málið rétt er  barnið  greindar eða þroskaskert  og kannski getur það ekki eða kann  ekki að stjórna  gjörðum sínum og  sennilega er það ástæða  þessa slyss.    Ef  ég  man  rétt var kennaranum dæmdar  10 milljónir króna  og móðir  barnsins  er ábyrg fyrir  greiðslunni.  Ég  hélt  að  þetta væri  vinnuslys  en ekki ofbeldisaðgerð af hálfu  móðurinnar í gegnum barnið,  gagnvart kennaranum.  Ég  reyndar játa að ég hef ekki lesið dóminn og þess vegna  þekki ég ekki alla málavexti - en samt.   Þeir sem beita konur og börn  hrottalegu  kynferðislegu ofbeldi,  sleppa sumir  með  nokkur hundruðþúsundkall í skaða og  eða miskabætur  og  skilorðsbundinn dóm.  Ég bara verð  að játa  að ég  skil  ekki samhengið í þessu.   Ég  hef  alltaf  litið svo á  að  lögin í landinu séu  " Common sense "  á  prenti  og  þess vegna verði  dómar  sem byggðir eru á  þessu að  hafa einhvern common sense  líka..  Æ  þetta  er bara búið að vera  að bögglast í mér um stund og nú er ég búinn að tjá mig  um málið og .........

Hafið það eins og þið  viljið og berum virðingu fyrir löggunni..

Magnús G. 

      

Í dag kynntist ég nýrri konu...

Hún er  komin af léttasta  skeiði  er  bandarísk  held  ég og ótrúlega  fjölhæf.  Kynnin  við  hana  gera  mann  eins og mig að ótrúlega  miklu  fjölhæfari  manni en áður,  þannig að  þetta  sýnist  mér  ætla  að  verða  frábært samband  okkar í  milli..

Konan  heitir  Betty og  ber  fjölskyldunafnið  Crocker  og  hún  hjálpaði  okkur  Hákoni  með aldeilis  flott bakkelsi  í  dag,  já við  skelltum  í  eina  Gulrótarköku  sem tókst svona ljómandi  vel..  Smelltum  líka  Iceing  á  kökuna  og  ég er  ekki  viss  um  þær  séu  neitt betri  þessar flottu úr  bakaríunum,  allavega  getur  maður  sagt með stolti  að  maður hafi  bakað  sjálfur, en það getur maður ekki  ef  maður  stoppar  hjá  JF  á  leiðinni heim.  (Jói er  náttúrulega flottur sko en .....)

Ég verð  að  játa að  þetta er í  fyrsta  sinn á  ævinni sem ég  baka  köku  aleinn og sjálfur  án þess að hringja  í  nokkurn  mann  og  leita  ráða,  bara ég og  Betty  saman í  eldhúsinu og  svo kom  Konni  og  setti  kremið  á kökuna  og  uppí  sig sjálfan.   Já  þetta  gat  ´ann  kallinn. 

Annars  ætla  ég  líka  að játa  á mig  að  hafa  ekki farið útúr  húsi  í  dag   og  Hákon hefur  ekki klætt sig,  alveg  slakur og  við erum búnir að slappa  feikilega vel af í dag,  fengum líka heimsókn frá  þeim  sómahjónum  Magnúsi  og  Steinunni  sem færðu  okkur  blóm og  mynd,  takk fyrir  okkur.

Eitt  enn  ætla  ég að játa á  mig.   Ég  málaði  tvær  smámyndir  í  dag  með olíumálningu,  hef  ekki gripið  í  penslana  mína  í  ein  4 ár og  mikið  var þetta  gaman,  nú  læt  ég  slag  standa og held  áfram,  frábær  útrás  sem  maður fær  við  að  mála.  Ég er  nú  enginn Kjarval  ennþá  en  hver  veit  hvað  verður,  þetta  er  víst aðallega  æfing  og  eitthvað  smá  af  hæfileikum.  Nú  er  bara að  æfa  sig...

Semsagt  frábærir  páskar  að  lokum komnir  og  ég  tekst á  við  nýja  viku  fullur af  orku  og  eldmóði. 

Hafið  það eins og þið  viljið  á næstu  dögum

Magnús G.

Set inn  mynd af flottu kaffisetti sem hæfir svona flottu bakkelsi.